Республикысе йоча да самырык-влаклан В.Х.Колумб лӱмеш книгагудышто эртаралтше «Мый йӧратем родной элемым» почеламутым сылнын лудмо республикысе конкурсышто изирак ийготан-влак коклаште Драгояр Янаев сеҥышыш лектын. Тудо Медведево район Арбан школышто 2-шо классыште тунемеш. Диплом ден пӧлекым налаш лекмекыже, зал гыч тыге ойлымым кольым: «Тудо Герасимов Микайын кугезе уныкаже». Чоным куан да кугешнымаш кумыл авалтыш. Конкурс деч вара марий рвезе дене лишкырак палыме лийна.
Лӱмжат ойыртемалтше. Тудо мом ончыкта? Тыландат пален налаш оҥай, шонем. Тидын нерген рвезын аваже каласкалыш:
– Ачаже эн ончыч Белояр лӱмым темлен, мый – Драгоным. Вара ик лӱм гыч тӱҥалтышыжым, весе гыч мучашыжым налынна да ушенна. Драгояр лӱм лектын. «Драгоценный» да «ояр» манме лиеш.
Драгояр сылнымутлан изинек шӱман. Ушышкыжо иктаж-могай оҥай шонымаш толешат, вигак кагазым налеш да почеламутым воза. Кочаже искусствоведений доктор О.М.Герасимов тӧрлаш полша.
– Драгояр марий йылмым сайын пала. Пырля тунемме йолташыже-влак, рвезым ончен, порын кӧранат да тудын дене тӧр лияш тыршат, – мутланымашке ушныш туныктышыжо Л.А.Яндыганова.
