Марий калыкын ик эн йӧратыме пайремже, Марий тиште кече, Йошкар-Олаште ик шӱлыш дене эртаралтын. 10 декабрьыште М.Шкетан лӱмеш Марий национальный драме театрыште илыш кече мучко шолын. Книга, сӱрет, тоштер арвер-шамыч, кидпаша ончер, этноурок, сылнымут да сылнысем шагат, регион-влак кокласе уш-акыл марафон, тӱрлӧ мастер-класс-шамыч да молат лийыныт.
«Ямде лий» газет редакций Морко район Арын школ да Марий образований институт дене пырля эртарыме «Сергей Григорьевич Чавайным моктен мура Марий кундем!» конкурсшым иктешлен. «Сылнымут» таҥасыште 1-4-ше класслаште тунемше-влак коклаште К.Лебедев (У Торъял, Немда) сеҥышыш лектын, 5-9-ше классла коклаште – Д.Тойбахтина (У Торъял, Тошто Торъял), 10-11-ше классла коклаште – А.Иванов (Морко, Нуж-Ключ).
«С.Г.Чавайнын произведенийлаж почеш сӱрет» таҥасыште 1-4-ше клас-слаште тунемше-шамыч коклаште В.Неведицына (Йошкар-Оласе 9-ше номеран школ), И.Королёв (Медведево гимназий), Е.Анисимова (Параньга, Олор) ойыртемалтыныт. 5-8-ше класслаште шинчымашым погышо-влак коклаште эн сылнын сӱретлыше семын А.Николаевам (Морко, Унчо), А.Ревелевам (Кужэҥер школ), А.Аклинам (Йошкар-Оласе 19-ше номеран школ) палемденыт. 9-11-ше класслаште тунемше-влак коклаште А.Миклеева (Йошкар-Оласе 14-ше гимназий) сеҥышыш лектын. Туныктышо-шамычат серызын илыш корныжо да усталык пашаж почеш дидактический материалым ямдыленыт. Шернур район Кукнур школышто тӱҥалтыш класслам туныктышо Т.А.Конакова ты таҥасыште чылаштым ончылтен. Сеҥыше-влакым саламлена да ончыкыжымат марий йылмым йӧраташ да сылнымут дене пеҥгыде кылым кучаш тыланена.
