Йоча-влак, те кажне кечын гаяк мультфильмым ончеда. Персонаж-влак дене пырля куанеда, ойгыреда, тӱрлӧ нелылык гыч пырля лектыда, юзо тӱняшке логалыда, порылык да осал нерген шонкаледа. А мультфильмын чоҥалтмыже, войзалтмыже нерген паледа? Уке? Йошкар-Олаште верланыше Республикысе йоча да самырык-влаклан технике усталык рӱдерыште «Мульти-варка» йоча анимаций студийым вуйлатыше А.В.Бирюкова тидын дене палдара:
– Эн ончыч сценарийым возена, сӱретым ямдылена (раскадровка), персонаж-влакым шонена, ну-ным тӱрлӧ материал гыч чоҥена але сӱретлена, декорацийым ыштена. Тидым войзена, фото ден видео-влакым эрыктена, сӧрастарена. Тушко йӱкым пыштена. Паша монтаж дене мучашлалтеш. Тыге мультфильмым кӱктен луктына. Тудо сай качестван лийшаш. Тӱҥалтыште телефонымат кучылтын кертыда.
Йоча-влак персонажым пластилин гыч ненчат, сӱретлат. Курчак геройыш савырнен кертеш. Компьютер графике: полиграфий дизайн да 3D – дене пайдаланат.
«Мульти-варка» студийыште «Мыйын икымше мультфильмем» усталык конкурсым шукерте огыл иктешленыт. Йоча-влак курчак дене мультфильмым ямдыленыт. Сеҥышыш Лиза Дегтярева лектын. Тудо «Кот и щука» мультфильмым войзен.
Ӱдыр-рвезе-влак, тенданат кумылда лекте? Тугеже пашалан пижса. Мультфильмым кузе сниматлыме нерген Интернетыште видео-влакым ончен кертыда.
