Морко район Арын селаште «Золотые купола – 2021» православный паша лагерь мучашлалтын. Тӱрлӧ кундем гыч толшо 90 утла йоча жапым пайдалын эртарен. Ӱдыр-рвезе-влаклан поян программым ямдыленыт. Ик кечын мастер-классыште гипсеш сӱретлаш тунемыныт гын, вес кечын «Зарнице» дене модыныт. Военно-спортивный модыш гоч йоча-влакым тӱшка дене пашам ышташ, виян, лӱддымӧ, патриотизм шӱлышан лияш туныктеныт.
МЧС кече йоча-влаклан кужу жап шарнымашеш кодеш. Утарыше-шамыч тулым йӧртышӧ машина, ӱзгар-влак дене палдареныт.
Паша пукша, йӱкта, паша илаш туныкта. Тиде ой лагерьыште каныше йоча-влаклан келшен толеш. Кутко гай пашаче икшыве-влак телылан пум рӱж ямдыленыт, 100 мужыр утла выньыкым пидыныт, эм шудым погеныт.
