Зоя ДУДИНА, поэт, Марий Эл Республикысе тӱвыран сулло пашаеҥже:
– Йошкар галстукан йоча жапем чынак сылне лийын. Пионерын товатмутшо, ушемын «Ямде лий!» ӱжыкшӧ (девизше), тӱҥ кӱштыкшӧ-влак илышын кӱчык-кужужым, чын ден шояжым изинекак умылаш полшеныт. Валя Котик лӱмеш отряд, Зоя Космодемьянская лӱмеш дружине. Пионервожатый Лидия Петровна Бусыгина-Васина – ӱмыреш сай йолташ. Тудын эртарыме сборжо, линейкыже, концертше, КВН-же… Ох, чылажат шарналтеш.
Пионер илышемым «Ямде лий» газет, юнкор паша утларак сылнештареныт. «Ямде лийлан» кӧра «Орлёнок» лагерьыш миенам. Редакцийыште Марий кугыжаныш университетышке тунемаш пураш темлымашым пуэныт. Туныктышо-журналист-влак Алексей Юзыкайн, Валентин Исенеков, Анна Петухова чын пионер лияш, чын айдеме лӱмым ӱмыр мучко арален илаш туныктеныт.
