Любовь СЕРГЕЕВА (ВОЛКОВА), Марий Эл Республикын калык туныктышыжо, Волжский район Карай школын директоржо:
– Икымше классыш тунемаш кайымеке, ачам «Ямде лий» газетлан, «Мур-зилка» журналлан подпискым ыштыш. Пионерыш пурымеке, «Пионерская правда» толаш тӱҥале. Пионер радамыш ушнымо татше могай шерге ыле. Йошкар галстукшо тугай чевер, кум лукан, уэш да уэш кучен ончымо шуэш. Пионер-влакын газетлаш возкалымыштым эре куанен лудым. Пионер лиймеке, мыят шукырак пайдале пашам виктарен кертам, шонышым. Шкежат газетлашке серкалаш кумылаҥым. Пашам-влакым савыкташ тӱҥальыч. Куанже мыняре ыле! Чолга юнкор лиймемлан «Пионерская правда» газет Почётан грамотым кучыктыш, а «Ямде лий» – «Артек» всесоюзный пионер лагерьыш путёвкым.
