Марий Турек район Косолап школын тунемшыже-шамыч Школьник-влакын российысе толкынышт дене пеҥгыде кылым кучат. Ик эн чолгаже – кудымшо классын тунемшыже Анастасия Зайцева.
– Тиде толкын дене кумшо классыште тунеммем годымак палыме лийынам. Экологий агитбригаде-влакын конкурсыштышт кумшо верым сеҥен налмына чонеш поснак кугу кышам коден. Школышто эртаралтше чыла мероприятийыште вӱдышӧ улам. Мураш, почеламутым лудаш йӧратем, – ойла ӱдыр.
Классыштыже редколлегийын членжылан шотлалтеш. Школ илыш нерген районысо газетышке заметкылам воза. Робототехнике дене пеҥгыде кылым куча. «Надежда» волонтёр отрядышке коштеш. Пырля погынен, «Академия творчества» проектым илышыш шыҥдареныт. Тунемше-влак куд кружокым шке гыч вӱдат. Мураш, кушташ, сӱретлаш, фото ден видеом ышташ туныктат, тӱрлӧ постановкым шындат.
– РДШ мыланна тӱрлӧ могырым вияҥаш, ончыко ӱшанлын ошкылаш йӧным ышта. Ме проект пашам возена, конкурс ден фестивальышке ушнена. Калык ончылно мастарлыкнам ончыктена. Чылажат ончыкылык илышыште кӱлеш, шонем. Школыштына тиде толкыным вуйлатыше Ирина Михайловна Богдановалан мыланна полшен шогымыжлан – кугу тау, – ойла чолга ӱдыр.
