Кодшо ийын Кужэҥер район Йӱледӱр кыдалаш школышто 4-ше классыште тунемше ӱдыр-рвезе-влак туныктышышт Л.В.Яковлева дене пырля «Орлята» программе почеш кыртмен пашам ыштымыштлан кӧра «Орлёнок» всероссийский йоча рӱдерыште лийыныт. Книгагудо поснак ӧрыктарен: ятыр ончер пашам ышта. Иктыже – «Народы России». Тӱрлӧ калыкын книгаж ден курчакше-влак коклаште марий сынаным нимом ужын огытыл. Ситыдымашым кораҥдаш манын, марий сынан курчакым «Орлёнокыш» колтеныт. Шукерте огыл рӱдер гыч куандарыше серыш ден вучыдымо пӧлекым налыныт (снимкыште). Йоча рӱдерысе книгагудын пашаеҥже-влак тауштеныт да марий курчак нунын ончерыштым пойдара манын палемденыт. Пӧлек шотеш орлятский символикан книга заложко ден краснодарысе чайым колтеныт. Тиде йӧршеш вучыдымо, но куанле лийын.
Фотом школ архив гыч налме.
