2 мартыште Марий кугыжаныш университетыште Российысе калык-влакын шочмо йылмышт да литературышт дене федерал олимпиадын иктешлыше йыжыҥже эртаралтын. Олимпиадыште Йошкар-Оласе да районласе школлаште 8-11-ше класслаште тунемше 116 ӱдыр-рвезе уш-акылжым терген.
Нуным Марий Эл Правительстве Председательын икымше алмаштышыже М.З.Васютин, Образований да науко министр Л.А.Ревуцкая, Марий кугыжаныш университетын Калыкле тӱвыра да тӱвыра кокласе коммуникаций институтын директоржо Р.И.Чузаев саламленыт да сай лектышым тыланеныт. Якутск оласе Йӱдвел-Эрвел федерал университетын шочмо йылме да литератур дене федерал олимпиадыжын координаторжо Е.С.Дьяконова палемден:
– Олимпиадын пайдаже кугу. Тудо шочмо йылмым йӧраташ, келгынрак тунемаш тарата. Шуко баллым погышо ӱдыр-рвезе-шамыч кӱшыл шинчымашым пуышо ятыр тунемме тӧнежыш вступительный экзаменым кучыде пурен кертыт.
Тыгай олимпиаде тений Татарстан ден Башкортостан республикла да Одо кундемыште эртаралтын. Сеҥыше-влакым апрель тӱҥалтыште увертарат.
