Йырым-йырысе средам аралыме тӱнямбал кече вашеш Марий Элысе агитбригаде-влак коклаште увертарыме республикысе ролик конкурс иктешлалтын. Тений тудын темыже «Марий кундем – шочмо кундемем» лийын. Чылаже 8 школ ушнен. Марий Турек школын «Берендей» командыже сеҥышыш лектын. Тунемше-влак роликым флешмоб эстафете формат дене войзеныт. Марий кундемым моктен, тудым аралаш кӱлмӧ нерген ойленыт, почеламутым лудыныт, мурым муреныт. 2-шо верыште – Марий Турек районысо Нартас школ, 3-шо верым Шернур районысо Марисола школ налын.
Снимкыште: Юлия УСОВА (Марий Турек школ) «Шочмо вер» мурым мура.
