Марий Эл Республикысе «ЗУМ» йоча киностудий «Всё для фронта, все для победы!» всероссийский конкурсышто сеҥышыш лектын. Конкурсыш кок документальный фильмым колтеныт. «Фильм-влакын режиссёрышт Михаил Долгоруков ден Иван Еропов улыт. «Когда началась война» фильмыште студийын участникше-влакын родо-тукымышт сар годсо илыш нерген каласкалат. Тунам кугыеҥ-влаклан веле огыл, йоча-шамычланат неле лийын. Тидын нерген фильмыште ойлалтеш. Кокымшо пашана «Экспедиция «Фронтовики» маналтеш. Тудо фронтовик-влаклан пӧлеклалтын. Йоча-влак еш архивым шымленыт, историй дене келгынрак палыме лийыныт. Йоча-влаклан ача-авашт полшеныт. Тўшка паша сеҥымашке шуаш полшен», – каласкала студийым вуйлатыше Елена Спиридонова.
