Амира Каирова ден Камиль Габдрафиков (снимкыште) тукым ака-шольо улыт, Руэм кыдалаш школышто тунемыт. Нуно сар пагытыште тылыште тыршыше труженик-влак нерген ешыштын историйже гыч палат.
Кугезе кочашт Амир Насырович Насыров 1929 ийыште Марий Турек районысо Карлыган ялсоветын председательже лийын. 1930 ийыште «Йошкар Октябрь» колхозым почыныт. Колхоз 50 ялым ушен. Тудым вуйлаташ А.Н.Насыровлан ӱшаненыт. Кугу Ачамланде сар деч ончыч кугезе кочашт Пижмарь ялыште «Кураш» кохозым вуйлаташ тӱҥалын. Сар жапыште колхозник-влак самолётым чоҥаш оксам погеныт, фронтлан кочкыш йӧрварым ямдыленыт. А.Н.Насыров калык коклаште пагалымашым сулен. Кугезе уныкаже, Амира, тудын лӱмжым нумалеш.
Л.ИВАНОВА.
Авторын фотожо.
