«Тÿнямбалне йолташ уло гын, пеш сай», – тыгай ӱжмаш почеш Марий Элыште «Марий кеҥеж Движение Первых дене пырля» уремысе фестиваль йоча-влакым иквереш чумыра. Тудо Марий Элым Вуйлатыше Юрий Зайцевын темлымыж почеш эртарыме «Марий кеҥеж» проектше радамыште илышыш шыҥдаралтеш.
Школ, тÿрлӧ рÿдер, тоштер, книгагудо да вес тӧнеж-влак йоча-шамычлан ятыр пайдале мероприятийым 31 август марте темлат. Теве Советский посёлкысо йоча рÿдӧ библиотеке «Лето с книгой на скамейке» акцийым эртарен.
– Книгагудо пашаеҥ-влак йоча модмо кумдыклаш лектыныт. Пеленышт книга-шамычым налыныт. Агния Бартон почеламут сборниклаже изирак икшыве-влаклан поснак келшен. Ятыр почеламутшым наизусть каласкаленыт, – ойла книгагудо вуйлатыше Н.В.Ямщикова.
Кеҥеж каникул годымат книга-влак шӧрлыкыштӧ пуракаҥын огыт шого. Икшыве-шамыч сылнымут произведенийлам, газет ден журналлам лудыт, у тунемме ийлан ямдылалтыт.
Кужэҥер район Йÿледÿр кыдалаш школышто гын, шуко мероприятий шочмо кундемым шымлымашлан пӧлеклалтын. Мутлан, ик мастер-классыште висвис гыч вуйшÿдышым ышташ туныктеныт (снимкыште). Весыште, тÿрлӧ кушкылым поген, нуным буква семын тодыштын, «Марийское лето» муткылдышым чоҥеныт. Ты годым кушкыл-влакым шымленыт.
– Йоча-влак дене пырля кажне кушкыжмын погынена. Вашлиймашым чолга тунемше-влак эртараш полшат. Тыге нуно лидер койышыштым вияҥдат, шке йырышт калыкым чумыраш тунемыт, икте-весылан ваш эҥертен пашам ыштымын кÿлешлыкшым шижыт, – палдара директорын воспитаний паша шотышто алмаштышыже З.А.Казанцева.
«Марий кеҥеж Движение Первых дене пырля» фестиваль йоча-влаклан кеҥеж канышым пайдалын, шарнымашеш кодшын эртараш, шинчымашым погаш, капкылым шуараш полша.
Оля МОШКИНА.
Фотом школ архив гыч налме.
