Морко районышто эртаралтше «Сылнымут шошо» усталык конкурсышко ий еда ушнем. Тушто сеҥыше-влак сотемдарче, туныктышо, священник Гавриил Яковлевич Яковлев лӱмеш премий дене палемдалтыт. Мыйынат тыгай сеҥымашем уло. Конкурсышто ойыртемалтше ӱдыр-рвезе-влак да туныктышо-шамыч кумда Российысе шнуй верлашке экскурсий дене шукерте огыл миенна. Мемнан школ гыч мыланем да София Алексеевалан (снимкыште) тыгай пиал шыргыжалын. Ме Муром, Рязань олалаште, Дивеево, Пощупово селалаште, Матвеевка ялыште лийынна. Шнуй верлаште шуко ум пален налынна. Уста поэт Сергей Есенинын шочмо Константиново селажым кугешнен онченна. Сылне вершӧр кумылым нӧлтен.
Арын черкысе Николай ачалан, районысо туныктымо пӧлкан тӱҥ методистше Светлана Леонидовна Александровалан мыланна тыгай чапле пӧлекым ыштымыштлан тауштена. У шӱлыш дене пойдаралтын, ончыкыжымат сылнымут пашам возаш кумылаҥынна.
Мария НИКОЛАЕВА.
Морко, Эҥерсола.
Фотом школ архив гыч налме.
