Пакчасаска витаминлан поян манме нерген сайын палем. Тидым мӧҥгыштат ойлат. Школышто пайдале кочкышлан пӧлеклалтше мутланымаш-влак эртаралтыт. Икана свежа пакчасаска гыч салатым ыштышна. Туныктышем, мый, пырля тунемме йолташем да полшаш толшо авам тамле, тӱҥжӧ пайдале салатым ямдылышна. Ковыштам, кешырым, пурысым, кияр ден помидорым падыштен пыштышна. Витаминлан поян кушкылым да грек пӱкшым ешарышна. Шинчалым пыштен, нӧшмӱй дене варышна. Салатым «Витаминная мозаика» манын лӱмдышна.
Богдан МОСОЛОВ.
Кужэҥер, Йывансола.
