Илья Кудрявцев Йошкар-Оласе 2-шо номеран школышто 2-шо «А» классыште тунемеш. Йӧратыме предметше-влак – физкультур ден математике. Ныл ияшыж годым ача-аваже футбол дене тренировкыш колтеныт. Тӱҥалтыште Ильялан футболла модаш келшен огыл. Икмыняр жап эртымеке, спортын ты видше эн йӧратымыш савырнен. Кызыт Илья урок деч вара арнялан ныл гана футболла модаш вашка. Кумиржылан футболист Криштиану Роналдум шотла. Тренерже А.М.Ласточкин изи футболист-влакын кумылыштым савырен мошта. Илья «Спартак» футбол команде дене чӱчкыдын таҥасымашлашке ушна. Кызытеш латкуд медаль ден кум статуэткым сеҥен налын. Рвезе эшеат чот шуаралташ да, кугу лиймекыже, палыме футбол командыш ушнаш шона. Тек тыге лиеш!
