Николаевмыт еш Провой кундем Выльыпсолаште ила. Самырык мужыр кум шочшым ончен кушта. Екатерина Сергеевна Памашсола школышто библиотекарьлан пашам ышта. Пелашыже Алексей Гурьевич – водитель. Чолга ача-аван икшывышт изинек тӱ рлӧ мероприятийыште участвоватлат. Степан 2-шо классыште тунемеш. Шахмат дене модмаште таҥаса да сеҥымаш дене куандара. «Зимнее настроение» почеламутым лудмо районысо конкурсышто кумшо верыш лектын. Йочасадыш коштшо Артём «В объективе мама и я», «Мой подарок маме» районысо конкурслаште диплом дене палемдалтын. Магдалиналан але кок ият уке. Уста изаже-влакым ончен, тудат чолгалыклан тунемеш. Николаевмыт «Всей семьёй» российысе проектын участникше улыт.
Сеҥыше радамышке лектыныт
– Екатерина Сергеевна, тыланда еш мо тыгай?
– Еш – тиде тӱҥ поянлыкем. Пеленем йӧратыме пелашем, шочшем-влак улыт. Икшыве-шамычын юарлымышт, воштылмышт.
– «Всей семьёй» проектыш ушнаш мо таратен? Пайдаже могайрак?
– Тиде мероприятий илышнам вес семын аклаш полша. Яра жапым еш дене пырля веселан эртарена да мом-гынат ум пален налына, альбомыштына оҥай фото-влак ешаралтыт. Ача-ава дене пырля лиймеке, йоча-шамыч утларак еш деке шӱмаҥыт. Проект келшен, икте-весылан эҥертен, полшен илаш туныкта, вашкылым пеҥгыдемда, чолгарак лияш йӧным ышта. Тӱрлӧ кидпашам ыштена, сӱретлена, почеламутым лудына, мурым мурена. Чыла тидым пырля войзен конкурсыш колтена. Библиотекыш миенна, лудмына нерген каласкаленна,каҥашенна.Тидат икшывына-шамычым книгам, сылнымутым утларак йӧраташ кумылаҥда.
– Йоча-влаклан могай заданий-шамыч поснак келшат?
– Спорт теме, кочкаш шолтымо да тӱвыра нерген заданийла нунылан утларак лишыл улыт. Курыкыш мунчалташ миенна. Кастене йоча-влак ачашт дене пырля шахмат дене модыт. Мый тренажёрым пӧрдыктылам. Тиде ынде ешын поро йӱлашкыже савырнен.
Пельменьым, пицым, когыльым ыштенна. Икманаш, кажне пашан пайдаже уло.
Николаевмыт еш «Всей семьёй» российысе проектыште сӱрет конкурсышто сеҥен да окса премий дене палемдалтын.
З.ТИМОФЕЕВА.
Фотом еш архив гыч налме.
