Морко район Купсола школын 3-шо классшым тунем пытарыше-влак Наташа Токунова ден Диана Григорьева марий йӱлам изинек шымлат. Уста кидмастар-влак дене палыме лийыт, нунын пашаштым ончен, шкештат тунемыт. Ӱдыр-влак Кугу Шале кундемын кидмастарышт Л.К.Васильева, Г.С.Михайлова, Н.А.Константинова нерген шымлыме пашам возеныт да «Ший талешке – тукым-влакым ушышо кыл» республикысе конференцийышке аклымашке луктыныт. Ты пашалан нуным туныктышышт Г.Н.Сергеева кумылаҥда.
– Шӧртньӧ кидан еҥ-влак, нунын кидпашашт нерген самырык тукым палышаш. Тачысе кечат, илен-толын, историйын ик ужашыже лиеш. Йоча-влак историйым палышт, калык дене кугешнышт шонен, мый пашам ыштем, – ойла Галина Николаевна.
Наташа ден Диана шымлыме пашам книгагудо гыч тӱҥалыныт. Книга, газет-влакым шергалыныт. Олыкъялыште верланыше Н.С.Мухин лӱмеш тоштер-пӧртышкӧ миеныт. Кидмастар-влак дене вашлийын кутыреныт.
– Ожно мастар-влак кидпашаштым кундем деч тораштат чапландареныт. XIX курымышто марий тӱр Российыште веле огыл, Европышто да Америкыште эртаралтше тӱнямбал ончерлаште лийын. Кызыт тӱня мучко шарлен, – палдарат ӱдыр-влак. – Мемнан кундемысе кидмастар-влак деч марий вургем, тӱр, ӱзгар нерген шуко оҥайым пален налынна. Нуно мемнам усталык деке шӱмаҥденыт. Шымлыме пашана дене йоча-влакым палдараш тӱҥалына.
