Марий Эл Республикын Правительстве пӧртыштыжӧ йоча-влакын кеҥеж канышыштым эртарыме нерген пресс-конференций лийын. Тений кеҥежым республикыште чылаже 187 лагерь пашам ышташ тӱҥалеш. Тушто 16 тӱжем утла йоча канен да тазалыкшым пеҥгыдемден кертеш. 168 лагерь ӱдыр-рвезе-влаклан кечывалым жапым пайдалын эртараш йӧным ышта. 14 стационар лагерь лиеш. Туризм, спорт дене кылым кучышо йоча-влак профильный лагерьыште канаш тӱҥалыт.
25 май гыч 31 август марте Российыште «Йоча туристический кешбэк» программе пашам ышта.
Мо тыгай кешбэк?
«Мир» карте дене оксам тӱлен, йоча лагерьыш путёвкым налмеке, 50 процент акым мӧҥгеш пӧртылташ лиеш.
Мом ыштыман?
Тиде программе почеш могай лагерь-влакын пашам ыштымыштым мирпутешествий.рф сайтыште «Детские лагеря» ужашыште ончыман.
Ешлан полыш
Программе дене келшышын, тӱрлӧ ийготан йоча канен кертеш. Кеҥеж мучко икмыняр гана пел ак дене канаш йӧн пуалтеш. Ешыште икмыняр икшыве уло гын, кажне путёвко гыч кешбэкым пӧртылтат.
