У Торъял школын 8-ше классшым тунем пытарыше Маша Домрачевам уста кидмастар манаш лиеш. Тудо крючок дене тӱрлӧ модышым пидеш. Шӱртӧ гыч шочшо кайык ден янлык-влак дене йолташыже-шамычым, родо-тукымжым куандара. Маша У Торъял посёлкысо книгагудышто мастер-классым шукерте огыл эртараш тӱҥалын.
– Шым ияш улмем годым ковам пидаш туныктен. Шарнен кодмеке, модышым пидаш тӱҥалынам. Кызыт суртыштем единорог, слон, маска, мераҥда молат илат, – ойла чолга ӱдыр. – Книгагудо пашаеҥ Алевтина Анатольевна Кочакова библиотекыште йоча-влакым туныкташ темлен. Мый шуко шоныде келшенам. Кумылан-влак ятырын улыт.
