«Уральский книгоход-2021» всероссийский сылнымут конкурсым иктешленыт. Йошкар-Оласе 7-ше номеран школын 10-шо «Б» классыштыже тунемше Юлия ШАМАРДИНА «Йоча прозо да поэзий» таҥасыште кумшо верым налын. Тудо пинеге нерген «История щенка» латныл главан ойлымашым возен.
– Мыланем почеламутым сераш утларак келша. Ик пийын историйже чонышкем логалын да ойлымашым возаш кумылаҥынам. Ойлымашыште пинеге орланымыже, куанымыже нерген каласкала. Тудым озаже йӧратен огыл. Акаже, изаже-влакым еҥ-шамыч наҥгаеныт, а тудо йокрокланен. Пинеге «Чудо» главаште пиалжым муын. У озан Мурка пырысше, Полина ӱдыржӧ дене палыме лийын. Пинегылан Лорд лӱмым пуэныт, – каласкала ӱдыр.
