Поэзий – чон шепка

«Поэт лияш мутым почела возен мошташ гына шагал. Тидын деч посна тӱням, айдемым, жапым шке семын эскерен, ужын моштышо ончалтыш кӱлеш. Калыклан шӱметын ойжым каласаш йӱлышӧ кумыл лийман…», – тыге ойлен кумдан палыме поэт В.Х.Колумб.

Республикысе марий тӱвыра рӱдер «Колумб лудмаш» оласе сылнымут конкурсым ий еда эртара. Тений тудо Республикысе йоча да самырык-влаклан В.Х.Колумб лӱмеш книгагудышто 19 майыште лийын. Ты пайрем сылнымутлан шӱман, поэтын поэзий саскажым аклыше витле утла  ӱдыр-рвезым иквереш чумырен. Йоча-шамыч Валентин Колумбын почеламутшым марла, рушла лудыныт, мурым йоҥгалтареныт.

Поэзийым йӧратыше кажне  ӱдыр-рвезым мокталташ лиеш. Чылан артист гай кертыт. Теве 27-ше номеран «Светлячок» йочасадыш коштшо Даша Зыкова «Тӱкан ия» почеламутым лудмыж дене чылам куандарен. Шым ияш марте марла лудшо-влак коклаште икымше верыш лектын.

Почеламутым марлат, рушлат наизусть тунемаш йӧратем. Йочасадыште эртаралтше сылнымут конкурслашке эре ушнем, сеҥыше радамыш лектам. Ты почеламутым тунемаш воспитатель Нина Кузьминична Солодкова темлен. Авам дене сылнын лудаш тунемынна, – ойла Даша.

Рушла лудшо-влак коклаште 13-шо номеран «Клюковка» йочасадын воспитанникше Миша Рябинин ойыртемалтын. Изирак ийготан-шамыч коклаште сеҥышыш лекше-влакым снимкыште ужыда.

8-10 ияш-влак коклаште И.С.Палантай лӱмеш т ӱвыра да сымыктыш колледжын Национальный сымыктыш гимназийжын тунемшыже Татьяна Дубинина икымше верыш лектын. 11-14 ияш-влак коклаште   10-шо номеран школын тунемшже Илья Инородцев   ойыртемалтын. Сервис технологий техникумын студентше Ксения Григорьева 15-18 ияш-влак коклаште    чылам ончылтен.

«Муро» таҥасыште 80-ше номеран «Ӱжара» йочасадын «Кечыйол» ансамбльже сеҥыше лийын.