Кажне ялын, уремын шке лӱмжӧ уло. Тунемше-влак нунын кушеч шочмыштым пален налаш кумылан улыт. Звенигово район Шолэҥер школышто тунемше Юлия Петрова шочмо вержын эртыме корныжым шымла. Тудлан руш йылмым да литературым туныктышо М.С.Виногорова полша.
– Шолэҥер посёлко да ты кундемыште верланыше ял-влакын лӱмышт нерген «Шочмо кундемын топонимикыже» шымлыме пашам возенам. Тунемше-влак дене анкетированийым эртаренам, – ойла Юлия. – Шуко ӱдыр-рвезе ял лӱм кушеч лекмым да мом ончыктымым огеш пале. Шолэҥер «шоло» да «эҥер» шомакла гыч шочын. Тудын историйже 1927 ий гыч тӱҥалын. Аниссола ялыш преданий почеш эн ончыч Максим лӱман пӧръеҥ илаш толын. Сандене ялым южо еҥ кызытат Макси-Арка манеш. «Анис» Онисим лӱм гыч лектын. Грек йылме гыч «пайдале» манын кусаралтеш. «Сола» – ял. Вес ял – Памаштӱр. «Памаш» да «тӱр» мутла гыч ышталтын. Кожласола «кож» да «сола» мут-влак гыч шочын. Ял лӱмым шымлыме годым калыкын историйже палдырна.
Шолэҥер посёлкышто 28 урем уло. Чолга тунемше урем-шамычын лӱмышт (годоним) нергенат пален налын. Ятыр уремын лӱмжӧ кумдан палыме еҥ-влак, профессий дене кылдалтын. Чодыра але ер воктеке лишкырак верланыше уремлан Ужар, Чодырасе лӱмым пуэныт. Шымлыме пашам возымо годым Юля раш умылен: кажне ялын историйже поян да оҥай. Шӱдӧ дене ий эрта гынат, ял лӱм-влак аралалт кодыт. Тугеже кугезе тукым дене кылна нигунам огеш лушко. «Ты паша моло ӱдыр-рвезе-шамычымат шочмо кундемыштын эртыкыштым шымлаш тарата манын шонем», – ойла Юлия.
