Пушеҥгым шындыме жап

«Шошо – пӱртӱс помыжалтме пагыт. Сандене пушеҥгым ты жапыште шындаш тыршыман», – ойла Советский лесничествым вуйлатыше Д.Н.Шадрин (снимкыште). Дмитрий Николаевич деч икмыняр  ой-каҥашым шотыш налза.

Сад-пакчаште да чодыраште пушеҥгым шындыме радам икте-весыж деч ойыртемалтеш. Пушеҥгын вожшым шотыш налман. Нуно рӱдӧ да шарлыше лийыт. Кеч-могай пушеҥгым шындыме годым вожоран рӱдӧ вургыш савырнымыж марте веле мланде дене урыман.

Сад-пакчаште рӱдӧ вожан кушкылым шындыме годым лакым келгыракым ыштыман. Лакыш ӱяҥдышым але кошкышо лышташым пышташ лиеш. Сортым шотыш налман да верым чын ойырыман. Мутлан, виш-не ден сливым пече воктене шындыман.  Лоп (вӱдан) верыш пушеҥгым шындыме годым эн ончыч вӱд йоген кайыме корным кораҥдыман. Тидлан лакыш тыгыде кӱм але кӱртньӧ калайым пыштыман.

Чодыраште пушеҥгым шындаш Колесовын кердыжым кучылтыт. Кердым мландыш кералын, лакым ыштат. Тушко кушкылым (утларакше кумияшым) вожшым ачален шындат. 10 сантиметрым коден, вес рожым ыштен, керде дене вожым ишат, йол дене темдалыт. Утыждене келгыш шындаш ок лий, темдалме верыште лакым кодыман огыл.

Изи пушеҥге писынрак илана. Кугурак кушкылым мландыге шындат.