Башкортостан Республикысе Дӧртыльӧ районысо Йывачял клуб пелен «Калык сем» калык фольклор да «Чолга шӱдыр» йоча ансамбль-влак пашам ыштат. Нуным О.Б.Исламов вуйлата. Йоча ансамбльым 2011 ийыште чумырымо. Тушко изирак, кыдалаш да кугурак ийготан ӱдыр-рвезе-влак коштыт.
– Йоча-влак мураш, кушташ кумылан улыт, – ойла Йывачял школ директорын воспитаний паша шотышто алмаштышыже Л.И.Исламова. – Икымше классыште тунемше-влакымат (снимкыште) «Чолга шӱдырыш» тений ушенна. Марий тӱвыра дек изинек шӱмаҥдыман манын шонена. Тиде шонымашым ача-ава-влак кумылын вашлийыныт. Йоча-шамычлан сылне марий вургемым ямдылаш полшеныт.
«Чолга шӱдыр» ансамбльыш коштшо икшыве-влак ялыште, районышто эртаралтше тӱрлӧ пайремышке ушнат. Конкурслаште мастарлыкыштым ончыктат, сеҥымашышт дене вуйлатышыштым, ача-аваштым куандарат.
