Волжский районысо Шарача школышто 341 икшыве тунемеш. Тений 1-4-ше класслаште шинчымашым погышо 161 йочам «Орлята России» радамыш пуртеныт. Нунылан торжественно значокым кучыктеныт, галстукым пижыктеныт.
– Тыгай движений самырык тукымым чын корныш шогалташ йӧным ышта. Нуно патриотизм шӱлыш дене шуаралт кушкыт. Кажне сомыл порылык, ваш келшымаш дене кылдалтын. Кугуракым пагалаш кумылаҥыт. Ме тиде толкынын программыже почеш пашам ыштена. Шкенан гимнна уло. Экологий направлений дене йоча-влак шырчык омартам ямдыленыт, школ йыр шӱкшакым эрыктеныт. Коча-кова-шамычын пӧрт сомылкаштым ышташ коштыт, кевыт гыч кочкышым налын кондат. Кажне командын лидерже уло. Чолга ӱдыр-рвезе-влак тӱрлӧ конкурсым, мероприятийым эртарат. Теве «Мыйын еш архивем» конкурслан тукымвожыштын эртыме корныштым шымленыт, сай пашам ямдыленыт. Томцевмыт еш республикыште икымше верыш лектын, – ойла директорын воспитаний паша шотышто советникше Екатерина Васильевна Кузьмина.
«Орлята России» толкын йоча-шамычлан шкеныштым тӱрлӧ могырым тергаш йӧным пуа. Ончыкылык корным ойыраш полша. Шкалан ӱшаным шочыкта.
З.ТИМОФЕЕВА.
