Классыштына 22 ӱдыр-рвезе улына. Пелыже марла огеш умыло гынат, марий йылмым кумылын тунемыт. Йылмынам лывырташ манын, туныктышына Л.В.Волкова спектакльым шындаш темлыш. Тиде ой дене вигак келшышна. Тыге «Рвезе тукым» изи театр шочо. Кызыт тушко 12 тунемше коштына. Арнялан ик гана репетицийыш погынена. Оршанке район Кугунур школышто Я.П.Майоров-Шкетанын «Кок сӱанат пеле» комедийжым да Шернур район Кукнур школышто А.Конаковын «Ику» драмыж гыч ужашым модын ончыктенна. Мыланна калык ончыко лекташ келша.
Ксения ВЕТКИНА.
1-ше номеран Шернур школ.
