Парикмахерын пашаже сӱретчын гай, фантазийже нимучашдыме лийшаш. Парикмахер уста кидше дене ӱпым моторын пӱчкеш, чиялта, тӱрлӧ причёскым ышта. Н.Г.ВАСИЛЬЕВА медшӱжарлан тунем пытарен, 2000 ийыште Волжск оласе техникумышто парикмахерлан кум тылзаш курсым эртен да таче мартеат йӧратыме сомылжым шукта. Кызыт Йошкар-Оласе «Этюд» парикмахерскийыште тырша. Кок ийлан ик гана шинчымашыжым Москошто нӧлта.
– Наталья Геннадьевна, тендан клиентда шуко. Туге гынат, утларакше йоча-влак дене пашам ышташ йӧратеда.
– Йоча – тиде весела, кумылым нӧлтышӧ изи айдеме. Тудым эре куандарыме шуэш. Эн изи клиентем кум ияш. Кеч-кунамат йоча дене лыжган кутырен, шке деке савырен моштыман. Южгунам артист семын модаш перна. Тунам паша ӱзгарем-влак йомакысе юзо геройыш савырнат. «Нуно ӱпым шке пӱчкедат, шерыт, мый кучем веле», – ой дене шуко ньогам лыпландаренам.
– Тыланда ӱпым пўчкаш але мотор причёскым ышташ утларак келша? Ӱдыр-рвезе-влак кызытсе жапыште могай стрижкым ойырат?
– Мый стрижкым ышташ йӧратем, причёскым ышташ толшо-влакат улыт. Йоча-влаклан лӱмын стрижке уке. Могайым кугыеҥ-влакыным ужыт, тугайым йодыт. Тӱредме годым ӱпын могай улмыжым шотыш налман. Мутлан, кудыр да вияш ӱп иксемын ок воч. Пытартыш жапыште рвезе-влак пелмогырыш оптыман стрижкым ойырат, тыгак икмыняр тура линийым, волгенче гай сӱретым але вес тӱрлӧ узорым ышташ йодыт. Ӱдыр-влак утларакше причёскым ышташ толыт. Кужу ӱпым моторын пунаш, пеледыш семын сӧрастарен опташ йодыт. Кӱчык ӱпым укладкым ыштена. Каласынем, ӱдыр-шамычын ӱпыштым кум тылзылан ик гана тӧрлаш келшен толеш а рвезе-влакыным – кажне тылзын.
– Кызыт шуко самырык-влак ўпым чиялтат, мелированийым, клорированийым ыштат. Тиде ӱплан эҥгекым ышта мо?
– Шуко чияште аммиак деч посна манын возат гынат, тушто тудо уло, лач процентше шагалрак. Сандене ӱпым 14-16 ияш марте эмгаташ сай огыл. Мый икмыняр ӱп ярымым чиялташ темлем. Тидын годым чиям ӱп вожыш тӱкыман огыл, аллергий лийын кертеш.
– Мотор, йылгыжше, таза ӱпан кажне лийнеже. Икмыняр ой-каҥашым палаш сай ыле.
– Ӱпым мушмо деч вара арган ӱйым йыгаш сай. Тудо товаҥалтме деч арала, кушкаш полша. Ӱпым кошташ феным ида кучылт. Кеҥежым, кече пелтыме годым, вуйчиемым чийыза.
