Шернур район Лажъял школын 6-шо классыште тунемшыже Элина Антропова (снимкыште) шукерте огыл эртаралтше «Он вчера не вернулся из боя…» республикысе сӱрет конкурсышто сеҥышыш лектын. Конкурс Кугу Ачамланде сарыште сеҥымылан 75 ий темме вашеш эртаралтын. Элина «Стоять насмерть» лӱман сӱретше 1-ше вер дене палемдалтын. Ӱдыр тале кредалмашым тӱрлӧ чия полшымо дене мастарын ончыктен. «Сарым сӱретлаш манын, историйым сайын палыман», – ойла Элина.
Э.Антропова изинекак сӱретлаш кумылан. Мӧҥгыштӧ ачаже сӱретлаш шӱмаҥда гын, школышто – ИЗО предметым туныктышо А.Ю.Волкова. Элиналан пӱртӱсым, еҥ-влакым сӱретлаш келша. Ончыкыжым сӱретче лияш шона. Ӱдыр мастарлыкшым тӱрлӧ конкурсышто терга. Район газетын эртарыме «Идалыкын символжо» конкурсышто, Марий Эл Республикын паша да калыклан паша вер шотышто департаментын эртарыме «Охрана труда глазами детей» сӱрет конкурсышто 1-ше верыш лектын.
