И.А.ГАВРИЛОВ, Морко район Унчо селасе этнокультур комплексын пашаеҥже, калык мастар:
– У ий – йомакым ушештарыше, кугыеҥымат ик жаплан йоча пагытыш пӧртылтышӧ пайрем. Йӱштӧ Кугызалан кызытат ӱшанем. Изиэм годым пӧлекым кондымыжым йывыртен вученам. Икшыве-влакан лиймеке, юзо кочаш савырнен, нуным куандаренам. Кызыт Йӱштӧ Кугыза кажне ийын суртышкына толын саламла.
Пагалыме коча-кова, ача-ава, ӱдыр-рвезе-влак, шушаш У ий пайрем дене шокшын саламлем. Йоча-влак, сайын тунемза, паша деч ида лӱд. Пайдале сомыл илышыш вашталтышым пурта, сеҥымашыш шуаш полша. Ида ӧркане, телефон олмеш тӱрлӧ кидпашам ыштыза.
