31 январь гыч 14 март марте Йошкар-Оласе Сеҥымашын XXX идалыкше лӱмеш тӱвыра полатыште «Великая сила родной земли» фестиваль эртаралтеш. Тудо Кугу Ачамланде сарыште сеҥымылан 75 ий теммылан да Марий Эл республикын 100 ияш лӱмгечыжлан пӧлеклалтын. Чыла районласе мурышо да куштышо коллектив-влак мастарлыкыштым ончыктат. «Жизнь – подвиг» фотовыставкым чумырат. Фестиваль 6 майыште кугу концерт дене мучашлалтеш.
1 февральыште Шернур районысо мастар-влак калыкым куандареныт. Нунын коклаште И.Н.Молотов лӱмеш йоча сымыктыш школысо «Кнопочки» мурышо ансамбль лийын.
– Кугу Ачамланде сар нерген кажне йоча пала. Неле годым кузе салтак-влак муро гоч чоныштым луштарыме нерген шкежат шуко каласкаленам. Сандене Сеҥымашын 75 ияш пайремлан пӧлеклалтше кеч-могай мероприятийлан ӱдыр-рвезе-влак кӱлынак ямдылалтыт, – ойла ансамбль вуйлатыше Светлана Николаевна Иванова.
Фестивальыште изи артист-влакын «Солдат молоденький» мурым шергалтарымышт деч вара, «Молодцы!» кычкырен, калык кужу жап рӱжге совым кырыш.
