Сардаялыште – у школ

«Образование» нацпроектын «Современная школа» регионысо проектше почеш Марий Турек район Сардаялыште 60 веран у школым чоҥат. Паша 20 декабрьыште мучашлалтшаш. Тидын нерген школ директор П.В.СОРОКИНА  дене мутланышна.

– Полина Владимировна, тачысе кечылан мом ыштен шуктымо?

– Ик пачашан школ лиеш. Тачысе кече марте фундаментым ыштеныт. Тиде арнян пырдыжым кермыч дене опташ тӱҥалыныт. Тыгодым иканаште вес паша шолеш: вӱдпучым шупшыт, школ йыр асфальтым шарат. Школлан оборудованийым, мебельым наледена. У школым чоҥаш 170 миллион утла теҥгем ойырымо.

– Школ мо дене ойыртемалташ тӱҥалеш?

– Кызытсе илышлан келшыше кабинет-влак лийыт. Кажне классыште – интерактивный доска. Ӱдыр-влакым ургымо пашалан туныктымо кабинет лиеш. Столяр пашам вияҥден колташ рвезе-влаклан посна верым ойырымо. «Н» буквала койшо полатыште – ныл блок: тунемме корпус, йочасад, спортзал ден актовый зал иктеш, столовый. Душ кабине, гримёрный лийыт.

У школым почмо дене тунемме пашаште могай вашталтышым вучеда?

– Спортым вияҥден колтынена. Ӱдыр-рвезе-влакым технологий кабинетыште пырля туныктенна гын, ынде посна кабинет-влак ойыралтыт. Шке сценына лиеш: тӱрлӧ спектакльым ончыктен кертына. Кружок-влакым ешараш шонена. Шымлымаш пашалан кугурак тӱткышым ойырынена. У пианиным пуат, йоча-влакым музыкылан утларак шӱмаҥдаш тӱҥалына. Марий йӱлам вияҥден колташ йєн лектеш.

– Чонышто могай шижмаш озалана?

– Моткоч йывыртенна. Тиде татым кужу жап вученна. Ача-ава-влак пеш куаненыт. Пашам ышташ кумыл утларак уло.