Спортышто ончылно лияш вий, пеҥгыде капкыл веле огыл, пӱсӧ уш-акылат кӱлеш. Тидым Параньга школын 11-ше классыштыже тунемше Дарья Харитонова раш пала. Чолга ӱдыр 5-ше классыште тунеммыж годымак спорт дене кылым кучаш тӱҥалын. Тидлан Усола школын тренерже М.А.Богдановлан да Мария акажлан таушта.
Дашан сеҥымашыже куд ий жапыште ятыр погынен. Спорт ориентирований, спорт туризм дене районысо, республикысе, регион-влак кокласе таҥасымашлаште мыняр пӱжвӱдым йоктарен, мыняр меҥгым эртен? Шотлен от пытаре!
– Республикысе таҥасымашке визымше классыште тунеммем годым миенам. Мыланем оҥай да тыгодымак лӱдыкшӧ лийын. Ориентирований-лабиринтыште виемым терген, кумшо верым сеҥен налынам. Умбакыже тыршаш кумылем утыр ылыжын, – ойла ӱдыр.
Дарья «Лӱдыкшыдымылык школ» российысе йоча да самырык-влак мер толкынын эртарыме таҥасымашлаштат команде дене вийжым терген. «Развивайся с нами» регион-влак кокласе дистанционный таҥасымаште шукерте огыл сеҥышыш лектын. «Лӱдыкшыдымылык школ» толкынын 2022 ийыште эн сай участникше» йӱклымаште чыланыштым ончылтен. Ятыр гана ончылно лиймылан тудым Марий Элын сборныйышкыжо налыныт.
Чолга спортсменын грамот ден дипломжо-влак ятыр улыт. Пырдыжыштыже кумло медаль волгалт кеча. Дарья капкылжым кажне кечын шуара, уш-акылжым пойдара. Йолташыже-влак дене пырля шошым, кеҥежым куржталыт, телым ече дене коштыт.
– Ӱдыр-рвезе-шамыч, яра жапдам кузе эртараш огыда пале гын, спортсмен-влак радамышке ушныза, – ойла Даша.
