Арняште куд гана 3-4 шагат дене спортзалыште жапым эртараш мыняр чытыш да вий лийман?! Медведево район Руэм школын 4-ше классыштыже тунемше Юлиана Пидаева тидлан жапым ок чамане: тудо кумдан палыме спортсменке лийнеже.
– Ныл ияшыж годым спорт гимнастике дене олимпийский резерв спорт школыш кошташ тӱҥалынна, – ойла ӱдырын аваже Наталия Николаевна. – Ик-кок занятийыш миен толмеке, Юлианалан келшен. Тренер Н.М.Бойкова тудын лывыргылыкшым ужын, умбакыже шуаралташ темлен. Спортын ты видше дене кудымшо ий кылым кучена.
Спорт школышто кажне ийын разрядыштым пеҥгыдемдат. Юлиана кугыеҥ-влакын спорт гимнастике дене кумшо спорт разрядыштым кодшо ийын налын. 2021 ийыште Марий Эл Республикын первенствыштыже кокымшо верыш лектын.
– Тыгай сеҥымаш-влак ончыко каяш вийым ешарат, – ойла самырык спортсменке.