Тачысе кечын йоча-влак тӱрлӧ технике дене пеҥгыде кылым кучат. Телефон, компьютер ончылно яра жапым эртарат. Сандене, очыни, шинчалыкым чийыше йоча-влак ий гыч ийыш ешаралтыт. Шинчам аралыме, кандарыме шотышто да моло йодышым рашемдаш манын, Медведево посёлкысо рӱдӧ эмлымверыште офтальмологлан пашам ыштыше М.С.Кириллова дене мутланенна.
– Кешырым, модым шуко кочкат – сайын ужаш тӱҥалат, маныт. Тиде чын мо?
– Модышто, кешырыште да моло пакчасаскаште витамин шуко. Но нуно шинчам огыт пӱсемде. Емыж, паксасаска деч посна тӱрлӧ колым, торыкым кочман. Кажне кочкыш могай-гынат витаминлан поян. Мутлан, А витамин шинчалан эн кӱлешан. Тудо шинчачорам пеҥгыдемда. С витамин шинчам кислород дене тема. Лютеин шинчавам, шинчагӱм пеҥгыдемда.
– Кеҥежым шинчам кандараш, вияҥдаш могай упражненийым темледа?
– Гаджет дене пайдаланыме деч вара шинчалан зарядкым ыштыман. Тидлан гимнастике уло. Торашке ончыман, вара – лишке, кӱшкӧ-ӱлыкӧ, шолашке-пурлашке. Кум-вич секундлан шинчам тазан кумыман да почман. Лу-латвич секунд шинчам пып-пыч ыштыман. Ик-кок секунд канымеке, эше писынрак почын петырыман. Зарядкым кажне кечын ышташ лиеш.
– Школыш каяш вашке жап шуэш. Начар ужшо йоча мынярымше партыште шинчышаш?
– Чын ойырымо шинчалык дене йоча кумш-нылымше парт коклаште шинчен кертеш. Южо икшыве очким, линзым чиен ок керт. Але шинчалык денат черлан кӧра начарын ужеш гын, икымше партыш шындыман.
