Журналистикыште ойыртемалтмылан «Ямде лий» газетын икымше редакторжо Зинаида Емельяновна ЯКОВЛЕВА лӱмеш премий дене 1-ше номеран Шернур школын тунемшыже Дмитрий ВЕДЕНЬКИН палемдалтын. Поэзийыште ойыртемалтмылан АНТОНОВ Ивук лӱмеш премийым Кужэҥер район Шӱдымарий школын тунемшыже Аня АНДРЕЕВА налын. Юнкор да сылнымут пашам сайын виктарен колтымылан Валентин Борисович ИСЕНЕКОВ лӱмеш премийым Волжский район Сотнур школын «Русская словесность» кружокшылан (вуйлатыше – Э.А.ЕГОРОВА) пуымо.
Нунылан кубок ден пӧлекым Россий писатель ушемын еҥже-влак А.А.Петров, Л.Г.Иксанова, «Марий книга издательстве» савыктыш пӧртын директоржо Ю.И.Соловьёв кучыктеныт.
«Почётан юнкор» лӱм дене Волжский район Пӧтъял школын кугурак вожатыйже, туныктышо-организаторжо Лидия Викторовна Кошаева палемдалтын. Поро йолташна ӱмыржӧ мучко йоча газет дене пеҥгыде кылым куча. Парт коклаште шинчымыж годым чолга юнкор лийын. Кызыт школышто «Ал сескем» юнкор кружокым вӱда, йоча-влакым сылнымут деке шӱмаҥда. Тунемше, туныктышо, ача-ава-влак коклаште «Ямде лий» газетым шаркала.
Тений лауреат-влак деч посна «Ямде лий» газет дене пеҥгыде кылым кучымыштлан, чолга юнкор улмыштлан да ончыкылыклан ӱшаным пуымыштлан изирак ийготан икмыняр ӱдыр-рвезым палемденна. Тиде Шернур район Кукнур школ гыч Костя Шехурдин, Морко район Коркатово лицейын тунемшыже Полина Алексеева, Звенигово район 2-шо номеран Красногорский школ гыч Аня Виногорова.
Ӱдыр-рвезе-влак, теат конкурсышко ушныза! Тудо кажне ийын эртаралтеш. Ик ий мучко тӱрлӧ темылан заметкым, йомакым, ойлымашым, мыскарам, почеламутым возыза да редакцийыш колтыза. Тендан коклаште ончыкылык уста журналист, серызе-влак лийыт манын ӱшанена.
