Шарачасе чаҥ

У ий вашеш кажне икшыве могай-гынат пӧлекым вуча. Теве Волжский район Кугу Шарача школын 8-ше классыштыже тунемше Арсений Голигоров (снимкыште) ден 1-ше номеран Шернур школын 8-ше классыштыже тунемше Анна Лазарева тыршымыштлан кӧра «Юный архивист» всероссийский конкурсышто икымше верым сеҥен налыныт. Шкаланышт шке шерге пӧлекым ыштеныт. Арсений Кугу Шарача селаште верланыше святой великомученик Дмитрий Солунский лӱмеш храмын чаҥже-влак нерген шымлыме пашам возен.

– «Истоки» кружокыш коштшо тунемше-влак икана ты храмыш миенна, – каласкала Арсений. – Тушто мыланна катлыше кӱртньӧ пудыргым ончыктеныт. Кугыеҥ-влакын каласкалымышт почеш палем: XX курымын 30-шо ийлаштыже селасе храмым петыреныт, чаҥ-влакым кырен шалатеныт, эн кугужым черкывуй гыч мландымбаке волтен шуэныт. Катлыше пудырго тунамсе чаҥын ужашыже манын шонаш чыла амал лийын. Но тидым доказатлаш кӱлын. Мый пашалан пижым: пудыргын нелытшым, кугытшым, кӱжгытшым висышым. Кум вере перыме лакым шекланышым.

Арсенийлан келге шымлыме пашам возаш историйым да обществознанийым туныктышо М.М.Михайлова полшен.  Рвезе Интернетыште чаҥ-влак нерген шинчымашыжым пойдарен. Селасе храмын историйжым шымлен, савыкталтдыме архив материалллан, еш архивлан эҥертен. Ялласе шоҥгыеҥ-влак дене вашлийын мутланымеке, чаҥ-влакым шалатымым да ужашлажым, машинаш оптен, Зеленодольск оласе заводыш левыкташ наҥгайыме нерген пален налын. «Ожно храмыште тӱрлӧ кугытан шым чаҥ лийын. Кызыт 8 чаҥ уло. Эн кугужо – 230 килограмман  чаҥ-благовестник, эн изиже 4 килограмман», – ойла рвезе.

  • Людмила Григорьева

    "Ямде лий" газетын тӱҥ редакторжо.

    Related Posts

    Йоча газет дене пырля лий!

    «Ямде лий» газетыште республикысе чолга ӱдыр-рвезе-шамыч нерген шуко материал, ушакылым пудыратылаш таратыше модыш-влак да молат савыкталтыт. Йочан сылнымут саскажым иквереш чумыра, увер тӱняш омсам почеш. Марий сылнымут деке шӱмаҥше, калыкын…

    Марий олаште

    Башкортостан Республик Калтаса, Мишкан, Пӱрӧ районла гыч куд тунемше ден кум туныктышо Йошкар-Олашке марий йылме да литератур дене регион-влак кокласе олимпиадышке микроавтобус дене миенна. Тушто мемнам шокшын вашлийыныт, тӱшкагудышко илаш…