«Толын вучымо У ий» кидпаша конкурсым «Ямде лий» газет редакций ден М.Шкетан лӱмеш Марий национальный драме театр эртарышна. Таҥасымашке 32 паша пурен. Мо гына тушто уке: кагаз, мамык, куэм, пу, эсогыл ракывот гыч ыштыме кож, Йӱштӧ Кугыза ден Лумӱдыр, 2020 ийын озаже – Куголя ден игыже – да молат.
– Марий йоча газет ден Марий драмтеатр пырля келшен пашам ыштышаш. Тӱрлӧ конкурсым, викториным, модышым иквереш эртарышаш. Вет ме ончыкылык тукымым куштена. Теве ты конкурс – пырля ыштыме сомылнан лектышыже, – ойла М.Шкетан лӱмеш марий национальный драме театрын директоржо Эрик Алексеевич Юзыкайн.
Кажне паша мотор, юзо шӱлышан да весым тыгайым нигуштат от му. Сандене сеҥыше-влакым ойыраш куштылго лийын огыл. Театр пашаеҥ, артист-влакын йӱклымышт почеш ойыртемалтше паша-влак палемдалтыч. У Торъял кыдалаш школын 4-ше классыштыже тунемше Анна Еросланова икымше верыш лекте. Амира Каирова (Медведево район Руэм школ, 4-ше класс) ден Эльмир Анисимов (У Торъял район Токтарсола школ, 6-шо класс) кокымшо верым лош пайлышт. Советский район Шуарсола школын 1-ше классыштыже тунемше Матвей Петухов кумшо верым сеҥен нале. Сеҥыше-влакым 29 декабрьыште М.Шкетан лӱмеш Марий национальный драме театрыште саламленна.
