21 февральыште Йошкар-Олаште шочмо марий йылме, марий литератур, кугыжаныш марий йылме, ИКН предмет-влак дене республикысе олимпиаде эртаралтын. Тушто 9-11-ше класслаште тунемше, районыштышт сеҥышыш лекше 101 ӱдыр-рвезе уш-акылжым терген. Нуным Марий Эл Республикысе образований да науко министрын алмаштышыже Н.Б.Антоничева, Тӱвыра, печать да калык-влакын пашашт шотышто министерствын пӧлка вуйлатышыже И.Г.Садовин, МарГУ-н Калыкле тӱвыра да тӱвыра кокласе коммуникаций институтын вуйлатышыже Р.И.Чузаев, В.М.Васильев лӱмеш МарНИИЯЛИ-н директоржын алмаштышыже Л.Я.Григорьева саламленыт.
Олимпиаде – тунемшын шинчымашыжым да туныктышын паша лектышыжым тергыше таҥасымаш. Теният Советский районысо Ӱшнӱр школышто марий йылмым да литературым туныктышо З.А.Волкован тунемшыже-влак кӱкшӧ лектышым ончыктеныт, икымше верыш лектыныт: Александра Морозова (11-ше кл., марий йылме), марий литератур дене Людмила Гребнева (9-ше кл.), Кристина Чеботарь (10-шо кл.), Валентина Кушакова (11-ше кл.).
Тыгак марий йылме дене Дарья Захарова (9-ше кл., Волжский, Карай) да Анжелика Конакова (10-шо кл., Шернур, Марисола) ойыртемалтыныт.
Кугыжаныш марий йылме дене сеҥыше-влак:
Анна Алексеева (9-ше кл., 1-ше №-ан Морко школ);
Яна Ефремова (10-шо кл., Кужэҥер, Руш Шой школ);
Анна Зорина (11-ше кл., 2-шо №-ан Шернур школ).
ИКН дене сеҥышыш лектыныт:
Мария Зверева (9-ше кл., Звенигово, 2-шо №-ан Красногорский школ);
Алексей Виногоров (10-шо кл., 3-шо №-ан Советский школ);
Алексей Тришков (11-ше кл., 1-ше №-ан Звенигово школ).
Шочмо марий йылме да литератур дене сеҥыше-влак теҥгече, 28 февральыште, Йошкар-Олаште регион-влак кокласе олимпиадыште таҥасеныт. Олимпиадын лектышыжым вес номерыште лудса.
