Марий Турек район Сысоево школын тунемшыже-влак София Романова ден Катя Бабайкина дене палыме лийме деч вара ик илыш сӱретым шарналтышым. Ик ялыште йолташ-влак Миша ден Саша илен. Коктынат мутым колыштшо, чолга лийыныт. Кеч-кушко эре пырля коштыныт. Икана Сашалан коваже телефоным налын пуэн. Тиддеч вара рвезе йӧршын вашталтын: Миша деч кораҥын, телефонын кулыштыжо савырнен. Нине ӱдыр-влакым нимогай телефон огеш локтыл, шоналтышым. Нуно шке вийлан ӱшаныше, сеҥымашыш шуаш тыршыше улыт.
София ден Катя 2-шо классыште тунеммышт годым икымше гана ече ӱмбаке шогалыныт. Тиддеч вара спортын ты видшым тунар чот йӧратен шынденыт, школышто эртаралтше ик таҥасымашымат коден огытыл. Кызыт ӱдыр-влак школын чапшым районышто веле огыл, республикыште аралат.
– Тренировкылан кажне кечын икмыняр шагатым ойырена, – ойла Катя. –Сеҥымашке шуаш тренер Леонид Васильевич Музуров полша. Спортын пайдаже кугу, тидын нерген уста туныктышына раш умылтара. Мемнан вий- куатнам ужын, йолташна-влакат кумылаҥыт. Школышто ятыр спорт кружок пашам ышта. Теннис дене модаш школ вуйлатыше Юрий Александрович Зайцев туныкта. Ме тушкат уло кумылын коштына.
«Икымше медальым куштылго атлетике дене районысо таҥасымаште сеҥымемлан кучыктеныт. Шулдыраҥмемла чучын да ончыкыжымат тыршаш вий ешаралтын. Кызыт тыгай медаль лыҥ погынен», – ойла София.
