Марий йылмын моторлыкшым аклыше, тудым тӱрлӧ могырым шымлыше ӱдыр-рвезе-влак шинчалан вигак пернат. Нуно уш-акылыштым олимпиадылаште, тӱрлӧ модмаште тергат, мастарлыкыштым сылнымут конкурслаште ончыктат. Нунын радамыште – Советский район Кельмаксола кыдалаш школышто тунемше Виолетта Трифонова.
– Районышто да республикыште почеламутым сылнын лудмо, сочиненийым але эссем возымо конкурслаште 5-ше класс гычак шке вием тергем. Тиде тунемме ийыштат чолга лийынам. «Марла чын возена» тӱнямбал акцийыш, Марий Элын 105 ияш лӱмгечыжлан пӧлеклалтше «Шочмо вер – Марий кундем» да «Живи, язык мой родной!» регион-влак кокласе онлайн-конкурслаш ушненам. «О, мӱкш ава гай шочмо йылме» сылнымут таҥасымаш поснак ойыртемалтше лийын. Марий тиште кечын М.Шкетан лӱмеш Марий кугыжаныш драме театрын сценыштыже выступатленам. Тиде тат мыланем шерге. Сеҥымашыш шуаш шке вийлан ӱшаныман, лӱдман огыл, – ойла Виолетта.
Ӱдыр дене марий йылме дене олимпиаде годым палыме лийынна. Республикысе йыжыҥыште тудо икымше верым налын.
– Шочмо йылмем мый изинек пален кушкам. Школыштат йӧратен тунемам. Туныктышем Ирина Валерьяновна Караваева марий йылме да литератур деке шӱмаҥден мошта, келге шинчымашым пуа. Садлан олимпиадыштат лектыш куандарыше, – палемда ӱдыр.
Виолетта индешымше классым тунем пытарен, тӱҥ шинчымаш нерген аттестатым кидышке налын. Туге гынат шочмо школжо дене чеверласаш ок вашке. Умбакыже шинчымашым шочмо школыштак налаш шона.
Оля МАЙКОВА.
Фото-влакым еш архив гыч налме.
