26 январьыште Марий кугыжаныш университетысе Калыкле тӱвыра да тӱвыра кокласе коммуникаций институтышко республикнан чыла гаяк районжо гыч ӱдыр-рвезе-влак погыненыт. 9-11-ше класслаште тунемше 119 йоча марий йылме, марий литератур, кугыжаныш марий йылме да ИКН предметла дене, районысо олимпиадыште сеҥен, республикысе йыжыҥыш ушнен. Нуным Марий Эл Республикысе образований да науко министрын алмаштышыже В.Г.Гаврилова ден Марий кугыжаныш университетын образований паша шотышто проректоржо Э.М.Воронцова саламленыт.
– Шочмо марий йылмынам аралаш да тудын кӱлешлыкшым умылаш, кундемнан эртыме корныжым, йӱлажым, тӱвыражым шымлаш олимпиаде кугун полша, – ойлен Валентина Григорьевна Гаврилова.
Организатор-влакын палдарымышт почеш, тений олимпиаде кодшо ийласе деч утыжым ойыртемалтын огыл. Йылмын тӱрлӧ ужашыж дене кылдалтше заданийла, тест сынан паша-влак, палыме писатель-шамычын илыш корнышт да произведенийлашт дене кылдалтше йодышла лийыныт.
Шочмо марий йылме дене сеҥышыш Валерия Кузьмина (Курыкмарий, Пистерлі, 9-ше кл.), Дарья Загайнова (Советский, Кельмаксола, 10-шо кл.), Карина Лукианова (Курыкмарий, Микрік, 11-ше кл.) лектыныт.
Кугыжаныш марий йылме дене икымше верым Анастасия Сорокина (Кужэҥер, Руш Шой, 9-ше кл.), Анна Королёва (У Торъял школ, 10-шо кл.), Кристина Шапкина (Кужэҥер, Йӱледӱр, 11-ше кл.) сеҥен налыныт.
Марий литератур дене Мария Богданова (У Торъял, Токтарсола, 9-ше кл.) ден Диана Ешеева (Шернур, Марисола, 11-ше кл.) ойыртемалтыныт.
ИКН предметым эн сайын палыше-влак коклаште Шуко профилян лицей-интернат гыч Арина Курочкина (9-ше кл.) ден Степан Решоткин (10-шо кл.), Йошкар-Оласе 11-ше номеран лицей гыч Богдан Медведев (11-ше кл.) лийыныт.
Икымше верым сеҥен налше-влак шинчымашыштым 7 февральыште регион-влак кокласе олимпиадыште тергаш тӱҥалыт.
