Шукерте ожно чодыраште Шоган ден Кешыр иленыт. Икте-весышт дене келшен огытыл, эре ӱчашеныт, вашла игылтыныт.
– Мо пеш кочо улат? Садланак койышетат тыйын осал, – Кешыр Шоганым мыскылен.
– А тыйже шере, лайка улат гынат, койышет нимыняр пуш кыдо огыл. Эре еҥым игылташ веле ваҥен коштат, – шыдешкен Шоган.
Икана кува ден кугыза чодырашке толыныт. Марий пум чумырен, а пелашыже шудым поген. Кушкыл коклаш Шоган ден Кешыр логалыныт. Кува тамлен ончен, нуныжо моткочак тутлын чучыныт, да пеленже налын. Шолтымо кочкышышкат пыштен ончен, кугызаланат пеш келшен. Ик жап гыч кува чодыра гыч Шоган ден Кешырым куклен конден, йыраҥыш шынден. Тидым ужын, пошкудо-влакат шындаш тӱҥалыныт. Тыге ынде шуко ий Шоган ден Кешыр йыгыре йыраҥыште кушкыт. Тетла огыт ӱчаше. Икте-весыштым тӱрлӧ шукш-копшаҥге деч аралат.
Надежда ГОДУНОВА.
Йошкар-Ола.
