Ожно марий калык сурткӧргӧ ӱзгарым пу гыч пӱчкеден, уа гыч тодын, шун гыч ненчен. Уста еҥ-влакын мастарлыкышт тукым гыч тукымыш куснен толын.
Мастар-влак шун гыч тӱрлӧ арверым кызытат ненчат. Иктыже – Советский район Ӱшнӱр селаште илыше В.Г.Окунев. Тале кидмастар ӱдыр-рвезе-влакым ты пашалан туныкта. Ӱшнӱр школын тунемшыже Мария Петрова Владимир Геннадьевич нерген шымлымаш пашам возен.
– Шун гыч ненчыме нерген материалым эн ончыч интернетыште, газет ден журналлаште кычалынам. Вара кидмастар дене шинчаваш кутыренам, – ойла Мария. – Владимир Геннадьевич кидпашалан кугыеҥ-влакым ончен тунемын. Икымше шун шӱшпыкым йочаж годым ыштен. Кызыт школышто «Художественный керамике» кружокым вӱда. Мыят тушко уло кумылын коштам.
Уста кидмастар ненчаш йӧршӧ шуным Марий кундемыште кычалын. Кундыштӱр ял воктене пелганде шуным верештмеке, пашалан тудым кучылташ тӱҥалын. Тудын шӧртньӧ кидше дене ыштыме арвер-влакым конкурслаште, тоштерлаште ужаш лиеш.
«Мастар пашам шинчам куменат ыштен мошта», – ойлат калыкыште. Тиде ой Владимир Геннадьевичлан чынжымак келшен толеш. Ме тудын дене кугешнена, – ойла чолга ӱдыр.
