Йоча-влак, Школьник-влакын российысе толкынышкышт ушнен, тӱрлӧ направлений почеш пашам ыштат. Звенигово район Шолэҥер школышто ӱдыр-рвезе-влакым М.С.Виногорова вуйлата. Поро пашам ыштымашым ик эн ончыл верыш шындат.
– «Вместе» волонтёр отрядым 2021 ийыште чумырымо. Тушко 11-17 ияш лу тунемше ушнен. Нӧргӧ улына гынат, пашана дене лӱмнам сулена, шонем. Ме, поро пашам тӱшкан шуктен, еҥ-влаклан куаным кондена. Шоҥгыеҥ-шамычлан полшена, школ кумдыкышто, памятник йыр арулыкым эскерена. РДШ-н эртарыме чыла гаяк акцийышкыже ушнена, – ойла Марина Святославовна. – Ӱдыр-рвезе-влаклан кеч-могай пашам лӱдде ӱшанем. Шонымашна ятыр, нуным илышыш шыҥдарена.
Ушемын чолга еҥже-влак Юля Петрова, Ксения Феофанова, Мария Михайлова, Кира Ягодарова тӱрлӧ аланыште шкеныштым тергат: проектым возат, конкурслаште мастарлыкыштым ончыктат. Лидер койышыштым лагерьыш, слётыш, конференцийыш коштын пеҥгыдемдат. Изирак класслаште тунемше шольо-шӱжарыштым волонтёр лияш кумылаҥдат.