Школьник-влакын российысе толкыныштышт чолган пашам ыштыше ӱдыр-рвезе-шамычлан Советский посёлкысо Йоча усталык пӧртыштӧ районысо слёт эртаралтын. Тудо Пионерийын шочмыжлан 100 ий теммылан пӧлеклалтын. Ургаш лицей гыч визытын миенна. Пионер толкынын ветеранже-влак И.Пьянкова, Н.Мокосеева, В.Чимаева ожнысо илышышт нерген оҥайын каласкаленыт. Ме символике, муро, куштымаш, речёвко-влак дене палыме лийынна. Слётышто у йолташ-шамычым муынна. Вашлиймаш пионер тулотым ылыжтыме дене мучашлалтын.
Юлия УСОВА.
Советский район.
