«Университетские смены» – ончыкылык профессийым, школ деч вара тунемаш пураш келшыше тӧнежым ойырен налаш полшышо проект. Тений мыланем тушко ушнаш да Спорт да туризм шотышто Моско кугыжаныш университетыш миен толаш пиал шыргыжалын. Лу кече жапыште студент илыш нерген кумданрак пален налынам. Кугу кӱкшытыш шушо ятыр еҥ дене вашлиймаште лийынам. Нунын пайдале ой-каҥашышт, тыланымашышт таче кечынат чонем ырыктат, шонкалаш таратат.
Москошто лиймемлан да тудын моторлыкшым ужмемлан моткоч йывыртенам. Мемнам Йошкар площадьыш, «Зарядье» паркыш коштыктеныт. «Россия» национальный рӱдерыште кумда элыштына илыше калык-влак, нунын тӱвырашт дене палдареныт, виртуал экскурсий йӧн дене пайдаланен, поян пӱртӱсым ончыктеныт. Москомспортын спорт технологий рӱдерыштыже атлет-влакын ямдылалтмыштым, биохимий лабораторийын пашажым ужаш моткоч оҥай ыле.
Мыланем чылажат келшен. Икоян ятыр ӱдыр-рвезе дене палыме лийынам, шуко ум пален налынам. МГУСиТ-ыште ты программын вуйлатышыже Александр Александрович Иванцовлан да университетын пашаеҥже-влаклан мемнам шокшын вашлиймыштлан, нунын дене шергакан уна лияш йӧным ыштымыштлан тауштем.
Людмила ЕРОФЕЕВА.
Козьмодемьянск оласе «Дарование».
Фотом еш архив гыч налме.
