Сӧсна дене родо огытыл, но тудынла сигырат. Лӱмышт теҥыз дене кылдалтын, ийын моштат гынат, вӱдыштӧ огыт иле. Туштылан вашмутым палышда? Чын, тиде теҥыз сӧсна. Советский посёлко гыч Еменгуловмыт ешыште лач ты ныл йолан йолташ-влак илат. Аня ден Тимур (снимкыште) нуным моткоч йӧратат.
– Теҥыз сӧснам ашнаш куштылго, манаш лиеш. Нунын почеш эрыкташ веле ӧрканыман огыл. Тӱҥ шотышто шудым кочкыт. Клеверлан поснак куанат. Изи сӧснан ончылпӱйжӧ веле огыл, оҥгырпӱйжат ӱмыржӧ мучко кушкеш. Садлан пеҥгыдырак кочкыш кӱлеш. Йолташна-влак киярым, кешырым, ковыштам, олмам, шурно пырчым, салат лышташым йӧратат, – ойла самырык ава Наталья Валерьевна.
Теҥыз сӧсналан кеч-могай кочкышым пукшыман огыл. Кочушмен, редис, шоган, пареҥге, чеснок, лимон, гранат, шинчаланшудо, фасоль, шӧр, шыл, муно, кинде тазалыкшылан эҥгекым ыштен кертыт. Тыгак пӧлемыште утыжым шокшо да юалге лийшаш огыл.
Ты ныл йолан йолташ-влак еҥ-шамычын кумылыштым савырен моштат. Шкешт декат тӱткышым йодыт. Нуным чӱчкыдын кидыш налман, ниялтыман, кутырыман, пырля модман. Камвозыкташ ок лий, писын эмганен кертыт. Кечеш лу минут дене икмыняр гана веле малат, иктаж коло наре шагат эре чолгалыкыштым ончыктат.
– Суртыштына моткоч весела. Мемнан тыгак Кузя пырысна уло. Тӱҥалтыште тӱткын да ӧрынрак онча ыле. Кызыт тунемын шуын. Икманаш, ныл йолан йолташ-влак дене келшен илена, – ойлат Аня ден Тимур.
