Россий писатель ушемын Марий Элысе пӧлкаже самырык-влаклан «Сылнымут алмаштыш» республикысе конкурсым ий еда эртара. Тений тудо марий сылнымутын классикше С.Г.Чавайнын шочмыжлан 135 ий да РСФСР-ын сулло туныктышыжо, Кугу Ачамланде сарын участникше В.Ф.Сапаевын шочмыжлан 100 ий теммылан пӧлеклалтын. Конкурсым Марий Эл Республикысе тӱвыра, печать да калык-влакын пашашт шотышто министерствын, «Ший памаш» сылнымут фондын полшымышт дене эртареныт.
– Рушла да марла возышо 150 утла самырык авторын пашаштым аклыме. Ты гана почеламут ден йомак шукырак лийыныт. Пӱртӱс, шочмо кундем, вершӧр нерген сочинений сынан каласкалымаш ятыр пурен. Сеҥыше-влакым «Поэзий» да «Прозо» таҥаслаште палемдыме. Ӱдыр-рвезе-влак туныктышын полшымыштлан кӧра сеҥымашке шуыт. Нунылан дипломым да пӧлекым кучыктымо, – ойла Россий писатель ушемын Марий Элысе пӧлкажым вуйлатыше С.Д.Архипова.
Конкурсыш пурышо паша-влакым тӱрлӧ изданийыште савыкташ тӱҥалыт. Самырык возышо-шамычым «Сылнымут шыже» республикысе сылнымут семинарыш ӱжыт. Лӱмлӧ писатель, поэт, журналист-влак дене вашлийын мутланымаш пайдале да шергакан.
Морко район Коркатово лицейын тунемшыже-влак тӱрлӧ таҥасышке ушненыт. Регина Егорова ойлымашыж дене сеҥышыш лектын. Никита Васильев, Кира Смирнова, Надя Рассанова кокымшо лийыныт, Александра Васильева – кумшо. Нуным снимкыште ужыда. Ксения Иванова марла возымо почеламутшо дене кокымшо верым налын. Настя Михайлова ден Ангелина Уразаева рушла возымо почеламутышт дене кумшо верыш лектыныт.
