Марий сылнымутын вийже кугу. Тудлан шӱман улмо эсогыл тукым гыч тукымыш кусна. Букетовмыт ешыштат тыгак. Кумдан палыме Сайн эрге Сайгелде тукым гыч уста поэт Аркадий Букетовын ӱдыржӧ Ираида Букетова-Алвий ачажын корныжым тошка. Кум книгам савыктен луктын. Пытартышыже, «Вспомним свои корни», ош тӱням шукерте огыл ужын.
– Ираида Аркадьевна, сылнымут тӱняшке икымше ошкылым кунам ыштенда?
– Морко кандашияш школышто тунеммем годым возаш тӱҥалынам. Марий йылмым туныктышо Елизавета Петровна Семёнова возаш кумылаҥден. Изирак ойлымашем, ныл корнан почеламутем-влак пырдыжгазетеш савыкталтыныт. Кугурак лиймеке, Єтӧгӧн тукымемым шымлаш кумыл лектын. Ятыр статьям серенам, нуно тӱрлӧ газет ден журналыште савыкталтыныт. «Ямде лий» газетышкат колтенам. Марий Элын калык серызыже Юрий Галютин-Ялзак тукым изам лиеш. Тудо кугу шӱкалтышым ыштен. Юрий Иванович ятыр пайдале ой-каҥашым пуэн.
– Тугеже родо-тукымым шымлаш тӱҥалмыда сылнымутышко корным почын?
– Туге. Мый шкешотан шымлыме пашам эртаренам. Тидлан ачам илымыж годым кумылаҥден. Тудын илыш корныжо, усталык пашаж гыч тӱҥалынам. Архивышке пашашке коштмо семын кажне кечын вашкенам. Родо-тукымемын илыме верлашке коштынам але интернет дене кылым ыштенам. Фото-влакым погенам, палыме лийынам. XVI курым марте тукымвожемым шымленам. Уверым чумырымеке, моторын да чын возаш кӱлын. Тыге пером эркын-эркын пӱсемын.
– Кызыт ойлымашым, йомакым чолган возеда.
– Анюта ӱдыремын изи улмыж годым, урем дене ошкылшыла, тӱрлӧ оҥай сӱретым шекланаш йӧратенна. Корнышто вашлиялтше шукш-копшаҥгым, пушеҥге ден вондерын илышыштым эскеренна. Уремыштак йомак ушеш возалтын манаш лиеш. Тунам рушла серенам гын, кызыт марлат возем. Ужава ден Колятул, мотор Вуверкува нерген шукерте огыл серенам. «Сказочный город» руш йомакем «Сказки народов России» книгаште савыкталтын. Тиде мыланем кугу куан да пиал. Ойлымашым тӱрлӧ темылан марла да рушла возем. Сылнымут паша курымашлык, шонем.
